Shqipëria vijon të shpenzojë dukshëm më pak për arsimin se vendet e Bashkimit Europian. Në vitin 2023, financimi publik për arsimin ishte vetëm 2.9% e PBB-së, kundrejt mesatares 4.7% në BE, sipas Eurostat. Nëse do të përfshihej në renditjen e 27 vendeve anëtare, Shqipëria do të ishte e fundit. Rumania, vendi me nivelin më të ulët në BE, shpenzoi 3% të PBB-së.
Sipas analizës së Monitor, Shqipëria renditet e fundit edhe në Ballkanin Perëndimor. Mesatarja e rajonit është 3.9%, ndërsa Kosova kryeson me 4.7%. Për të arritur mesataren europiane, Shqipërisë do t’i duhej të rriste me rreth 60% financimin e arsimit në raport me madhësinë e ekonomisë.
