Anijet e Global Sumud, nisma humanitare në mbështetje të popullsisë së Gazës, që do të nisen nga porti i Brindisit më 20 gusht, në orën 22:00, dhe do të drejtohen për në Sazan, në Shqipëri, nuk e kanë zgjedhur rastësisht rajonin e Pulias. Sipas asaj që shkruan La Gazzetta di Mezzogiorno, «Puglia nuk është vendosur enkas».
Aktivistët, thuhet në një njoftim, do t’i bashkohen «protestës popullore» të organizatës Flamingo Revolution, kundër dhënies së ishullit të mbrojtur të Sazanit një fondi investimesh të lidhur me biznesmenin Jared Kushner, dhëndrin e Donald Trump.
Nisja e anijeve do të paraprihet nga disa aktivitete që do të zhvillohen të enjten në qytetin e Brindisit. Në orën 11:00 do të mbahet një konferencë për shtyp në bulevardin Viale Regina Margherita, për të shpjeguar objektivat dhe kontekstin gjeopolitik të misionit. Ndër të tjerë, do të marrin pjesë Tony La Piccirella dhe Yazan Issa nga Global Sumud.
«Puglia nuk është zgjedhur rastësisht. Rajoni nuk është vetëm objektiv i aktorëve dhe projekteve të ndryshme ekonomike – shpjegojnë aktivistët – si resorti Four Seasons në Costa Merlata (bregdeti i Ostunit, shën. i red.) – por është edhe vendi ku, 35 vjet më parë, u ankorua anija Vlora. Dy brigje të lidhura nga e njëjta luftë, të kërcënuara nga projekte që përjashtojnë komunitetet që kanë jetuar aty prej gjithmonë. Për këtë arsye, nisja nuk është vetëm simbolike – përfundojnë ata – por është një akt thellësisht solidar dhe politik».
LAPSI.AL
