Protestat kundër projektit në Zvërnec dhe qeverisë shqiptare janë shtrirë edhe në diasporë, me tubime të organizuara në disa qytete të Europës dhe Shteteve të Bashkuara.
Qindra shqiptarë janë mbledhur sot në Firence të Italisë, ku me flamuj kombëtarë dhe pankarta në duar kanë kërkuar dorëheqjen e kryeministrit Edi Rama dhe anulimin e projekteve që, sipas tyre, dëmtojnë pasuritë kombëtare. Protestuesit kanë bërë thirrje për më shumë transparencë, llogaridhënie dhe mbrojtje të zonave të mbrojtura.
Tubime të ngjashme janë zhvilluar edhe në Berlin, ku pjesëmarrësit protestuan me flamuj dhe pankarta, ndërsa kënduan në kor himnin kombëtar. Një ditë më parë, protestues shqiptarë u mblodhën edhe në Mynih me moton “Atdheu nuk shitet”, duke kërkuar mobilizim qytetar kundër projektit në Zvërnec.
Lëvizja ka gjetur mbështetje edhe përtej Atlantikut. Në Uashington, shqiptarë të diasporës protestuan para Ambasadës së Shqipërisë me pankarta dhe flamuj kuqezi. Protesta të ngjashme janë raportuar edhe në Londër, Vjenë e Milano, duke reflektuar një mobilizim të gjerë të diasporës shqiptare në mbështetje të kërkesave të ngritura në Tiranë.
