Pas më shumë se dy orësh e gjysmë protestë përpara Kryeministrisë, qytetarët nisën marshimin nëpër rrugët e Tiranës. Ata kanë vijuar thirrjet kundër qeverisë dhe duke kërkuar dorëheqjen e kryeministrit Edi Rama. "Edi Rama, o tradhtar, me Shqipërinë mos bëj pazar", "Rama, jep dorëheqjen", "Pa rini nuk ka Shqipëri", si edhe "Poshtë patronazhistët" janë thirrjet që shoqërojnë protestën.
Organizatorët ritheksuan pesë kërkesat kryesore të protestës: dorëheqjen e menjëhershme të kryeministrit dhe qeverisë; krijimin e një qeverie teknike tranzitore me mandat 12-mujor; ndryshime kushtetuese dhe ligjore, përfshirë kufizimin e mandatit të kryeministrit në maksimum dy mandate gjatë gjithë jetës politike; shfuqizimin e disa ligjeve, si ai për zonat e mbrojtura, trashëgiminë kulturore, Paketën e Maleve dhe investimet strategjike; si dhe hartimin e një kontrate të re sociale mes qytetarëve dhe shtetit, në bashkëpunim me ekspertë, intelektualë dhe qytetarë të propozuar nga protesta.
