Ministri i Brendshëm, Besfort Lamallari ka paralajmëruar se lista e personave të shpallur "non grata" nga qeveria shqiptare mund të zgjerohet, nëse institucionet e sigurisë konstatojnë se individë të tjerë përbëjnë rrezik për sigurinë kombëtare.
Lamallari tha se në tryezën e tij mbërrijnë çdo javë dhjetëra kërkesa nga agjencitë ligjzbatuese, të cilat shqyrtohen në kuadër të masave për mbrojtjen e rendit dhe sigurisë. Ai theksoi se autoritetet nuk do të tërhiqen nga zbatimi i ligjit, edhe në rastet kur personat e përfshirë marrin pjesë në protesta apo krijohet presion publik.
"Çdo javë kam në tryezën time dhjetëra kërkesa nga agjencitë e zbatimit të ligjit. Kjo është një punë dinamike që vazhdon çdo ditë. Nëse këta persona marrin pjesë në protesta, kjo nuk do të thotë se ne do të stepemi. Detyra jonë është të zbatojmë ligjin dhe të mbrojmë qytetarët shqiptarë, pa u ndikuar nga presioni publik apo debatet politike", u shpreh Lamallari.
Ministri shtoi se masat do të zbatohen ndaj çdo personi që konsiderohet kërcënim për sigurinë, përfshirë individë të përfshirë në krim të organizuar, krime të rënda, mashtrime apo shantazhe ndaj qytetarëve. Deklaratat e Lamallarit vijnë pasi autoritetet shqiptare shpallën "non grata" për 15 vjet Ikballe Hudutin.
