Qytetarët do të mblidhen sërish sot në Tiranë, në ditën e 88-të të protestës kundër qeverisë. Si çdo mbrëmje, grumbullimi pritet të nisë në sheshin “Skënderbej”, për të vijuar më pas me marshimin drejt Kryeministrisë. Prej afro tre muajsh, protestuesit kërkojnë dorëheqjen e kryeministrit Edi Rama dhe largimin e qeverisë. Ata kërkojnë gjithashtu krijimin e një qeverie tranzitore, e cila sipas tyre duhet t’i hapë rrugë një procesi të ri politik dhe zgjedhjeve të reja.
Në tubimet e fundit janë shtuar edhe thirrjet drejtuar drejtësisë. Qytetarët kërkojnë hetimin e zyrtarëve të lartë që i akuzojnë për korrupsion, ndërsa në shesh janë dëgjuar thirrje për arrestimin e Edi Ramës dhe Belinda Ballukut.
Protesta nisi fillimisht si kundërshtim ndaj projektit në Zvërnec, por me kalimin e javëve mori përmasa më të gjera. Në podium janë ngritur çështje që lidhen me korrupsionin, keqqeverisjen, koston e jetesës, emigracionin dhe funksionimin e institucioneve.
Ndërkohë, pas javësh protestash të përditshme, kryeministri Edi Rama vijon ta paraqesë mobilizimin si një zhvillim që, sipas tij, vetëm e ka bërë qeverinë më të fortë. Ai madje e cilësoi protestën një “dhuratë”, ndërsa pranoi se qeverisja duhet të përmirësohet. Një reflektim optimist, në një kohë kur prej afro tre muajsh poshtë zyrës së tij dëgjohen çdo mbrëmje thirrje për dorëheqje.
