Lufta me flakët në Lurë po vijon prej 24 orësh, ndërsa në terren janë angazhuar forca të shumta zjarrfikëse. Bëhet me dije se në terren ndodhen 260 forca, mes tyre punonjës të Bashkisë Dibër, Emergjencat Civile, shërbimet zjarrfikëse, forcat e Ushtrisë dhe Policia.
Drejtori i Administratës së Zonave të Mbrojtura, Dibër, Leonard Topuzi ka deklaruar se po punohet intesivisht për shuarjen e flakëve dhe neutralizimin e situatës, por terreni i vështirë po pengon afrimin e mjeteve të zjarrfikësve.
Në kuadër të kësaj, kanë mbërritur edhe dy helikopterë të cilët po ndërhyjnë nga ajri për shuarjen e vatrave të zjarrit. Më tej, Topuzi shtoi se bashkë me punonjësit e Bashkisë Dibër dhe kryetarin e bashkisë, Rahim Spahiu, është bërë e mundur mbrojtja e 5 banesave. Gjithashtu është bërë e mundur dhe mbrojtja e 2 staneve blegtorale, ku ndodheshin rreth 400 krerë bagëti të imta.
