Vajza e Michael Jackson, Paris Jackson, ka folur hapur për ndikimin që varësia nga alkooli dhe substancat pati në sjelljen dhe karakterin e saj.
Gjatë pjesëmarrjes në podcast-in e Jack Osbourne, “Trying Not to Die”, 28-vjeçarja pranoi se disa nga veprimet e saj gjatë asaj periudhe ishin “shumë të shëmtuara” nga ana morale.
“Jam rritur të jem e sjellshme dhe të trajtoj njerëzit me respekt. Më kanë mësuar të shikoj njerëzit në sy, të tregoj mirësjellje edhe në gjërat më të vogla,” u shpreh ajo.
Paris tregoi se kishte kaluar vite të tëra me urrejtje ndaj vetes, para se të arrinte gjashtë vite pa varësi. Ajo rrëfeu se kur konsumonte alkool, ndjente se humbiste kontrollin mbi vlerat dhe parimet e saj.
“Kur pija, gjithçka zhdukej. Bëhesha një person hakmarrës dhe krejt ndryshe nga ajo që isha në të vërtetë,” tha ajo.
Artistja zbuloi gjithashtu se problemet e saj nisën shumë herët, madje para kontaktit të parë me alkoolin apo drogën. Ajo tha se kishte luftuar për një kohë të gjatë me vetëlëndimin dhe me marrëdhënie jo të shëndetshme me ushqimin.
Në janar, Paris ndau me ndjekësit edhe përvojën e saj me rrugëtimin drejt kthimit në normalitet, duke theksuar se jeta pas varësisë nuk është gjithmonë e lehtë.
“Shërimi nuk do të thotë se jeta bëhet perfekte. Kam mësuar të jetoj me realitetin dhe sfidat e tij,” ka shkruar ajo në rrjetet sociale.
