Fergie është ribashkuar me grupin Black Eyed Peas gjatë ceremonisë së 52-të të American Music Awards, duke sjellë një nga momentet më nostalgjike të mbrëmjes.
Në eventin e mbajtur të hënën në MGM Grand Garden Arena në Las Vegas, grupi u shpall fitues i çmimit “Best Throwback Song” për hitin e tyre të vitit 2009, “Rock That Body”.
Pas shpalljes së fituesit, Fergie bëri një paraqitje surprizë në skenë, duke iu bashkuar ish-bashkëpunëtorëve të saj will.i.am, Taboo dhe apl.de.ap për të marrë çmimin.
“Çfarë momenti! Dua t’i falënderoj të gjithë fansat që votuan, që unë të jem këtu në skenë me miqtë e mi të vjetër, Black Eyed Peas,” tha Fergie gjatë fjalimit të saj të falënderimit.
Ajo shtoi se rikthimi i këngës në trend, veçanërisht përmes rrjeteve sociale si TikTok, e ka bërë edhe djalin e saj 12-vjeçar Axl të dëgjojë muzikën e grupit.
“Dua t’i falënderoj të gjithë ata që kanë bërë video në rrjete sociale dhe e kanë bërë këtë moment të mundur, që djali im tani e ka këngën tonë në playlistën e tij,” u shpreh ajo me emocion.
Grupi ndau gjithashtu momente të ngrohta në skenë, duke u mbajtur për dore dhe duke pozuar së bashku pas marrjes së çmimit.
Fergie u largua nga Black Eyed Peas në vitin 2018 për të ndjekur karrierën solo, por ka mbetur në marrëdhënie të mira me ish-bashkëpunëtorët e saj.
