Këngëtari Zayn Malik u përball me një situatë të tensionuar në Manchester të Anglisë, teksa po largohej nga hoteli i tij.
Sipas pamjeve të publikuara nga TMZ, artisti hasi vështirësi për të arritur te makina e tij për shkak të një turme të madhe personash që i kishin bllokuar rrugën.
Teksa përpiqej të hynte në një SUV, Malik u dëgjua duke thënë me nervozizëm: “Largohuni nga rruga!”.
Ndërkohë, anëtarët e sigurisë dhe stafi i tij kërkonin vazhdimisht nga të pranishmit të tërhiqeshin për t’i hapur rrugë këngëtarit.
Pas incidentit, Malik reagoi në rrjetet sociale duke sqaruar se problemi nuk ishin fansat e tij.
“Fansat kanë qenë dhe janë gjithmonë të respektueshëm dhe të mrekullueshëm. Problemi ishin disa burra të rritur që bllokuan hyrjen e hotelit dhe makinën për rreth 10 minuta,” shkroi ai.
Ai shtoi se këta persona “nuk janë fansa, por ndjekës obsesivë”, duke theksuar se sjellja e tyre është e pasigurt dhe dëmton marrëdhënien me fansat e vërtetë.
Ngjarja vjen në një periudhë të vështirë për artistin, i cili së fundmi ka anuluar turneun e tij në SHBA për shkak të problemeve shëndetësore.
Gjithashtu, emri i tij është përfolur edhe për raportet e tensionuara me ish-anëtarin e One Direction, Louis Tomlinson.
