Belén Rodriguez është liruar nga Poliklinika e Milanos, ku ishte shtruar pas një incidenti që alarmoi banorët e pallatit ku ajo jeton në zonën e Brerës.
Sipas mediave italiane, mëngjesin e 25 majit, një banor i pallatit kishte dëgjuar britmat e një gruaje që kërkonte ndihmë nga një apartament i ndërtesës. Pas telefonatës në numrin e emergjencës, në vendngjarje mbërritën policia, ambulanca dhe zjarrfikësit.
Raportohet se ndërhyrja zgjati për më shumë se tre orë, ndërsa Rodriguez hapi derën vetëm kur zjarrfikësit po përgatiteshin të hynin me forcë në banesë. Më pas ajo u transportua në spital për kontrolle të mëtejshme.
Zyra e shtypit e spitalit ka konfirmuar se gjendja e saj është e mirë dhe se ajo është larguar nga spitali.
Ndërkohë, mediat italiane raportojnë edhe për dy incidente të dyshuara rrugore gjatë fundjavës, ku një automjet tip SUV dyshohet se ka përplasur disa mjete të parkuara. Dëshmitarë pretendojnë se në timon ndodhej Rodriguez, por autoritetet vijojnë verifikimet për të identifikuar drejtuesin e automjetit.
Në muajt e fundit, Belén ka folur publikisht edhe për vështirësitë emocionale që ka kaluar, duke treguar se në të kaluarën është përballur me sulme paniku dhe depresion.
