PAMJET/ Gjendet e gjallë pas 4 ditësh nën rrënoja 6-vjeçarja në Nepal

Mes shkatërrimit të plotë që e ka zhytur Nepalin, zëri i një fëmije nga poshtë rrënojave ka sjellë një shkëndijë shprese.

6-vjeçarja Manisha Tamang kishte mbetur e bllokuar për rreth 60 orë në një ndërtesë të shembur në distriktin Timur, pasi përmbytjet dhe rrëshqitjet vdekjeprurëse të tokës  goditën vendin të mërkurën e kaluar.

Sipas Sky News, oficerët dëgjuan britmat e saj të premten dhe arritën ta gjenin, duke i hapur rrugën shpëtimit të saj. Policia lokale publikoi një video të momentit kur ekipet e shpëtimit nxorën vajzën nga rrënojat, si dhe ndihmën e parë që i dhanë më pas.

Numri i të vdekurve nga katastrofa vazhdon të rritet. Më shumë se 750 persona kanë vdekur në Nepal, ndërsa të paktën 16 janë raportuar në Kinë.

Autoritetet nepaleze po garojnë me kohën për t'u përballur me numrin në rritje të trupave që gjenden në zonat e prekura. Në të njëjtën kohë, më shumë se 3,000 persona janë ende të zhdukur, ndërsa operacionet e kërkim-shpëtimit vazhdojnë në kushte jashtëzakonisht të vështira.

Pjesa më e madhe e përpjekjeve është përqendruar në gjetjen e më shumë se 900 punonjësve të hidrocentralit që u zhduk pas përmbytjeve shkatërruese të së mërkurës.

Ekipet e shpëtimit kanë pompuar ajër dhe kanë hedhur ushqim në një tunel ku besohet se punëtorët janë të bllokuar, por autoritetet thanë se nuk ka pasur kontakt me askënd brenda.

Autoritetet nepaleze u bënë thirrje të mërkurën ekipeve të kërkim-shpëtimit të tregojnë "kujdes" ndërsa nivelet e ujit u rritën përsëri në një rajon në kufi me Kinën, i cili u godit nga përmbytje dhe rrëshqitje toke shkatërruese të mërkurën.

Shërbimi Gjeologjik i SHBA-së (USGS) vlerësoi se katastrofa e së mërkurës në kufirin e Nepalit me Kinën u shkaktua nga shembja e një akullnaje, e cila shkaktoi një rrjedhë të fuqishme uji dhe mbeturinash. ©LAPSI.al