Pavarësisht spekulimeve të shumta në rrjet se dasma e Taylor Swift dhe Travis Kelce ishte filmuar për një dokumentar të ardhshëm, burime pranë çiftit kanë hedhur poshtë këto pretendime.
Sipas revistës People, këngëtarja dhe ylli i NFL-së nuk kanë asnjë plan për të realizuar apo publikuar një film kushtuar ditës së tyre të martesës.
Zërat nisën pasi gjatë ceremonisë në Madison Square Garden u panë kamera profesionale dhe ekipe xhirimi, duke bërë që shumë fansa të besonin se dasma po regjistrohej për një dokumentar.
Taylor Swift dhe Travis Kelce, të dy 36 vjeç, u martuan më 3 korrik në një ceremoni madhështore në zemër të New York-ut.
Sipas përfaqësueses së Swift, nusja dhe dhëndri u veshën me krijime Christian Dior Haute Couture, të dizajnuara nga Jonathan Anderson. Këpucët u realizuan me porosi nga Christian Louboutin, ndërsa Taylor kompletoi pamjen me bizhuteri Cartier.
Çifti zgjodhi të mos kishte shoqëruese nuseje apo shoqërues dhëndri. Në vend të tyre, vëllai i Taylor, Austin Swift, mbajti rolin e "Man of Honor", ndërsa Jason Kelce, vëllai i Travis, ishte "Best Man". Ceremonia u drejtua nga aktori Adam Sandler.
Menjëherë pasi çifti tha "Po", ekranet gjigante jashtë Madison Square Garden shfaqën mesazhin "JUST&T MARRIED!", një lojë fjalësh me emrat e Taylor dhe Travis.
Një ditë para dasmës, përfaqësuesja e Taylor Swift njoftoi se çifti kishte dhuruar 26 milionë dollarë për organizata bamirëse, përfshirë Feeding America, ASPCA, organizatën The Store të Brad Paisley dhe Kimberly Williams-Paisley, si edhe Imagination Library të Dolly Parton.
Në ditën e dasmës, Dolly Parton falënderoi publikisht çiftin për donacionin prej 2 milionë dollarësh për fondacionin e saj.
Me humor, këngëtarja legjendare tha:
"Taylor dhe Travis, më thanë se po dhuroni 2 milionë dollarë për 'Imagination Library'. Jam pa fjalë dhe jashtëzakonisht mirënjohëse. Meqë e keni bërë bamirësinë pjesë të jetës suaj, kur të vijë fëmija juaj i parë, a mund ta kem unë? Do të jetë një fëmijë vërtet i veçantë", u shpreh ajo me shaka.
