Reperi i njohur amerikan Lil Wayne ka hedhur poshtë zërat se është fejuar, duke zbuluar se, në të vërtetë, ai dhe partnerja e tij i kanë dhënë fund lidhjes.
Në një video të publikuar në Instagram, artisti 43-vjeçar vendosi të sqarojë spekulimet që qarkullonin prej muajsh.
"E di që nuk ndaj shpesh gjëra personale, por dua të sqaroj diçka. Jo, nuk jam i fejuar. Kisha një marrëdhënie të bukur me një person të mrekullueshëm, por vendosëm të ndaheshim. Pra, jo, nuk jam i fejuar", tha ai.
Në të njëjtën video, Lil Wayne u kërkoi falje fansave për mungesën në koncertin hapës të turneut të tij "20 Years of Carter Classics" në Bangor, Maine.
Reperi zbuloi se nuk arriti të ngjitej në skenë për shkak të një problemi shëndetësor.
"Kam epilepsi dhe kriza epileptike. Fatmirësisht nuk kam pasur një krizë prej vitesh, por migrena e fortë është një nga shkaktarët e tyre. Atë natë pata një migrenë shumë të rëndë", shpjegoi ai.
Lil Wayne premtoi se do të rikthehet në Bangor më 28 korrik për të mbajtur koncertin e shtyrë, ndërsa siguroi se fansat që nuk mund të marrin pjesë do të kenë mundësi të rimbursohen për biletat.
Artisti u shpreh mirënjohës për mbështetjen e publikut dhe kërkoi ndjesë për zhgënjimin e shkaktuar nga anulimi i koncertit.
