Halle Berry i është përgjigjur ish-bashkëshortit të saj, Olivier Martinez, pas akuzave se ajo ka ushtruar dhunë ndaj djalit të tyre 13-vjeçar, Maceo.
Në dokumentet e depozituara në gjykatë, aktorja 60-vjeçare mohon kategorikisht akuzat dhe deklaron se ka qenë vetë viktimë e dhunës në familje.
“Unë nuk e kam abuzuar kurrë fizikisht, emocionalisht apo në ndonjë mënyrë tjetër Maceon. Jam viktimë e dhunës në familje dhe ndihmoj viktimat e dhunës në familje”, ka shkruar Berry në deklaratën e saj.
“Unë nuk jam person që ushtron dhunë. Nuk do ta lëndoja kurrë fëmijën tonë”, shtoi ajo.
Javën e kaluar, Olivier Martinez kërkoi kujdestarinë e vetme mbi djalin e tyre, duke pretenduar se Berry e kishte “abuzuar fizikisht” Maceon gjatë një incidenti më 26 shtator, si dhe duke ngritur akuza për “raste të tjera abuzimi” gjatë viteve të fundit.
Më 1 tetor, Martinez, gjithashtu 60 vjeç, mori një urdhër të përkohshëm kufizues ndaj aktores, i cili ndryshoi përkohësisht marrëveshjen e kujdestarisë. Berry kërkoi më pas rikthimin e marrëveshjes 50/50, e vendosur në gusht 2023, kur divorci i çiftit u finalizua.
Sipas Martinezit, Berry u zemërua me Maceon teksa ai po luante në realitetin virtual dhe dyshohet se e kapi nga qafa, duke i vështirësuar frymëmarrjen.
Berry e ka mohuar këtë version të ngjarjes dhe ka dorëzuar në gjykatë prova video, të cilat sipas saj “kundërshtojnë drejtpërdrejt” pretendimet e ish-bashkëshortit.
Aktorja shpjegoi se kishte hyrë në dhomën e djalit për t’i thënë se duhej të ndalonte së luajturi. Ajo nisi ta filmonte ndërsa ai vazhdonte të luante, ndërsa Maceo i mori telefonin nga dora.
Sipas Berry, të dy nisën të “luftonin në mënyrë lozonjare”, diçka që, siç tha ajo, e bëjnë shpesh.
“Unë nuk i vendosa kurrë duart rreth qafës së Maceos, nuk e mbyta, nuk i pengova frymëmarrjen dhe nuk i thashë të dorëzohej”, deklaroi aktorja.
Megjithatë, Berry pranoi se situata u përshkallëzua. Sipas saj, Maceo u mërzit papritur dhe e shtyu, ndërsa në atë moment i fejuari i saj, Van Hunt, u ngjit lart për të ndërhyrë.
Berry pretendon se djali e shtyu sërish pasi ajo tentoi t’i merrte kufjet e realitetit virtual. Hunt u vendos mes tyre, ndërsa Maceo kërcënoi se do të telefononte të atin dhe do të largohej nga shtëpia.
Berry më pas i dërgoi mesazh Martinezit, duke i kërkuar të vendoste kufij për sjelljen e djalit. Megjithatë, ajo lejoi Maceon të kalonte pjesën tjetër të fundjavës me të atin.
Aktorja tha se kur djali u largua, nuk kishte shenja në trup apo qafë dhe mohoi se i kishte kërkuar falje Martinezit për ndonjë dëmtim.
“Thashë se ndihesha ‘tmerrësisht keq për atë që ndodhi’, gjë që ishte e vërtetë”, shkroi Berry, duke shpjeguar se ishte e mërzitur që mbrëmja e tyre kishte përfunduar në konflikt.
Berry gjithashtu kundërshtoi kërkesën e Martinezit për kujdestari kryesore, duke argumentuar se ai nuk është i aftë të ofrojë “udhëzim të përqendruar te fëmija”.
