As vajzat nuk kursehen më nga dhuna e policisë së Edi Ramës. Pamje të fundit që vijnë nga bulevardi “Dëshmorët e Kombit” tregojnë një grup vajzash të reja që përballen me sulmin e autobotëve të policisë, ndërsa qëndrojnë të vendosura në protestë.
Ato nuk po ushtronin dhunë, nuk po hidhnin sende dhe nuk përbënin kërcënim për policët. Megjithatë, forcat e policisë i ka goditur me ujë me presion, duke u përpjekur t'i largojë me forcë nga bulevardi.
Por ajo që bie në sy në këto pamje është qëndresa e vajzave. Përballë presionit të ujit dhe forcës së policisë, ato refuzojnë të tërhiqen, në një akt të jashtëzakonshëm guximi dhe rezistence.
Dhe në fakt ky i sotmi nuk është një episod i izoluar. Vajzat kanë qenë protagonistet kryesore të protestave studentore që prej ditësh kanë përfshirë Tiranën. Në vijën e parë të marshimeve, ato kanë sfiduar frikën, gazin lotsjellës dhe ndërhyrjet e dhunshme, duke u kthyer në një nga simbolet më të forta të qëndresës së brezit të ri.
-
Fotot e rralla/ Vajzat ikonat e kësaj proteste
20 Tetor, 15:13
Ndërkohë, denoncimet për brutalitetin policor po shtohen nga dita në ditë. Plumba gome, protestues të plagosur, gjymtyrë të thyera, arrestime brutale dhe akuza për dhunë edhe brenda ambienteve të Kishës Ortodokse. Tashmë, as vajzat që protestojnë paqësisht nuk i shpëtojnë forcës së policisë.
E gjithë kjo ndodh ndërsa Edi Rama u ka premtuar policëve një bonus prej 2500 eurosh për secilin, për të shtypur me dhunë protestën.
Por nëse synimi është të frikësohet brezi i ri dhe të shuhet protesta, pamjet nga bulevardi dëshmojnë të kundërtën. Edhe përballë autobotëve dhe dhunës, vajzat vazhdojnë të qëndrojnë.
Një brez që nuk pranon të nënshtrohet, edhe kur përballë ka gjithë forcën e shtetit. ©LAPSI.AL
