Amanda Seyfried po përballet me kritika të ashpra pas pjesëmarrjes në dokumentarin e ri për Elizabeth Holmes, ku shikuesit e akuzojnë për hipokrizi dhe ndryshim qëndrimi.
Aktorja, e cila interpretoi themeluesen e Theranos në serialin The Dropout, shfaqet në dokumentarin You Can See Everything, që ndjek Elizabeth Holmes në periudhën para fillimit të vuajtjes së dënimit me burg.
Gjatë dokumentarit, Seyfried shfaqet duke reflektuar mbi mënyrën se si e ka parë Holmes dhe mbi ndikimin që pati interpretimi i saj në serial.
Ajo duket se zhvillon njëfarë mirëkuptimi për të, por tensionet shtohen kur Holmes vë në pikëpyetje mënyrën se si aktorja e portretizoi në ekran.
Disa shikues e kritikuan Seyfried-in në rrjetet sociale, duke e akuzuar se mbrojti Holmes-in derisa u vu vetë përballë kritikave për interpretimin e saj. Të tjerë e konsideruan sjelljen e saj kontradiktore dhe hipokrite.
Megjithatë, jo të gjithë ranë dakord me këto akuza. Disa shikues e mbrojtën aktoren, duke argumentuar se ndryshimi i mendimit të saj është pjesë e mesazhit të dokumentarit, i cili tregon se si perceptimi për një person mund të ndryshojë me kalimin e kohës.
Holmes u dënua me 11 vjet e tre muaj burg për mashtrimin e investitorëve përmes kompanisë së saj, Theranos, e cila pretendonte se mund të kryente analiza të shumta mjekësore me teknologji revolucionare.
