Dy persona janë arrestuar nga Policia Kufitare e Sarandës, pasi u kapën duke tentuar të transportonin kundrejt pagesës gjashtë emigrantë nga vendet e treta, të cilët synonin të kalonin ilegalisht kufirin dhe të vijonin drejt vendeve të Bashkimit Evropian. Sipas Policisë, dy të arrestuarit u kapën në vendin e quajtur “Pagane”, në afërsi të vijës kufitare me Greqinë.
Ata po përdornin dy automjete për të transportuar, kundrejt pagesës, gjashtë shtetas të huaj, me synim kalimin e paligjshëm të kufirit dhe vijimin e udhëtimit drejt vendeve të BE-së. Ndërsa, gjashtë emigrantët, shtetas nga Pakistani, Bangladeshi dhe India, u proceduan penalisht, pasi rezultoi se kishin hyrë ilegalisht në territorin shqiptar, duke kaluar kufirin tokësor me Greqinë.
