Pas më shumë se dy dekadash mungesë, Festivali i Pranverës do të rikthehet këtë fundjavë, duke sjellë sërish në vëmendje një nga ngjarjet më të njohura të muzikës së lehtë shqiptare. Organizuar nga Radio Televizioni Shqiptar, festivali do të mbahet më 6 dhe 7 qershor në Teatrin Kombëtar të Operës dhe Baletit.
Edicioni i ri synon të ndërthurë traditën me elementët bashkëkohorë të produksionit muzikor. Në konkurrim do të marrin pjesë 20 artistë me krijime të reja, të cilat do të interpretohen plotësisht live, të shoqëruara nga Orkestra Simfonike e RTSH-së dhe grupi muzikor i festivalit.
Përveç garës, në skenë do të performojnë edhe artistë të njohur të muzikës shqiptare, mes tyre Irma Libohova, Bashkim Alibali, Aleksandër Gjoka, Jonida Maliqi, Eneda Tarifa, Frederik Ndoci, Ledina Çelo, Rovena Dilo, Renis Gjoka dhe emra të tjerë që kanë lënë gjurmë në historinë e festivaleve shqiptare.
Organizatorët kanë premtuar një skenografi moderne dhe surpriza artistike që synojnë ta kthejnë festivalin në një nga ngjarjet më të rëndësishme muzikore të vitit.
Një tjetër element që ka tërhequr vëmendjen është prezantimi i festivalit nga dy figura të njohura të artit shqiptar: këngëtarja Bleona Qereti dhe aktori Nik Xhelilaj, të cilët do të udhëheqin dy netët festive në TKOB.
Fituesi do të përcaktohet nga një sistem i kombinuar vlerësimi. Pesha kryesore do t’i takojë jurisë profesionale me 60 për qind të votave, ndërsa 40 për qind do të vijë nga juria e quajtur “Pranvera Digjitale”, e përbërë nga personalitete të artit, medias, marketingut dhe sipërmarrjes.
Në panelin profesional bëjnë pjesë Ledina Çelo, Kejsi Tola, Kamela Islamaj, Markelian Kapidani dhe Eriona Rushiti. Ndërkohë, juria e “Pranverës Digjitale”, përfshin Sarah Berishën, Amos Zaharian, Krista Merkoçin, Arjon Muçën dhe Rizarta Hoxhën.
Festivali do të transmetohet drejtpërdrejt në RTSH 1 HD, RTSH Muzikë dhe Radio Tirana 1.
