Një operacion i gjerë antimafia është zhvilluar në orët e para të mëngjesit të së martës, 14 korrik, në Reggio Calabria, nën drejtimin e Prokurorisë së Antimafias së këtij qyteti. Hetimi, i koordinuar nga Drejtoria Distriktuale Antimafia dhe i zbatuar nga karabinierët dhe Policia e Shtetit, ka prekur disa prej klaneve historike të ‘Ndranghetës, përfshirë familjet De Stefano, Tegano dhe Condello. Autoritetet kanë ekzekutuar 79 masa sigurie, ku 73 persona janë dërguar në burg dhe 6 të tjerë janë vendosur në arrest shtëpie.
Të dyshuarit akuzohen, në varësi të rolit të tyre, për pjesëmarrje në organizatë mafioze, trafik ndërkombëtar të drogës, zhvatje, armëmbajtje pa leje, grabitje dhe vepra të tjera të kryera me metodë mafioze. Sipas hetuesve, grupet kriminale kishin ndërtuar një rrjet aktivitetesh ilegale, duke kontrolluar zona të territorit të Reggio Calabria-s dhe duke siguruar të ardhura përmes trafikut të drogës dhe presionit ndaj biznesmenëve e tregtarëve. Hetimet kanë nxjerrë në pah interesat ekonomike të klaneve mafioze dhe mënyrën se si ato menaxhonin aktivitetet kriminale për të ruajtur ndikimin në territor.
