Michael B. Jordan po përgatitet të marrë një pushim të gjatë nga kinemaja, pas një periudhe të ngarkuar në karrierën e tij.
Aktori 39-vjeçar ka zbuluar për Vogue se në vitin 2027 do të shkëputet për disa kohë nga filmat, një vendim që, sipas tij, e ka menduar prej më shumë se një dekade.
Para se të nisë pushimin, Jordan ka ende disa projekte të rëndësishme për të përfunduar. Gjatë pjesës së mbetur të vitit, ai do të jetë i angazhuar me xhirimet e versionit të ri të “Miami Vice”, ku do të luajë përkrah Austin Butler, si dhe me prodhimin e serialit spin-off të “Creed”, “Delphi”.
Më pas, në pranverën e vitit 2027, ai do të nisë promovimin e “The Thomas Crown Affair”, një rikrijim i filmit klasik, të cilin e drejton, e prodhon dhe ku luan gjithashtu rolin kryesor.
Pas këtij projekti, aktori do t’i japë vetes kohë për të pushuar.
“Me shumë gjasa do të marr pjesën tjetër të vitit pushim”, tha Jordan.
Ai shpjegoi se kjo periudhë do t’i shërbejë edhe për të reflektuar mbi karrierën dhe gjithçka që ka përjetuar vitet e fundit.
“Besoj se atëherë do të filloj të reflektoj dhe të përpunoj të gjitha këto. Sepse, sinqerisht, kam qenë gjithmonë në lëvizje”, u shpreh ai.
Vendimi vjen vetëm disa muaj pasi Jordan arriti një nga sukseset më të mëdha të karrierës. Në mars 2026, ai fitoi Oscar-in e parë, duke u shpallur Aktori më i Mirë për interpretimin e tij të dyfishtë si Smoke dhe Stack në filmin “Sinners”.
