Traileri i parë i plotë i “Digger”, filmi shumë i pritur komedi-dramë i regjisorit Alejandro González Iñárritu u publikua këtë të hënë. Publiku ka parë një anë të panjohur të Tom Cruise.
Filmi do të dalë në mbarë botën në fillim të tetorit dhe Cruise luan rolin e Digger Rockwell, "njeriu më i fuqishëm në botë" në një mision për të shpëtuar botën nga një katastrofë ekologjike.
Përpara lançimit të trailerit, Cruise foli në një event në Los Angeles, duke thënë se ishte ndryshe nga çdo projekt në të cilin kishte punuar më parë.
“Nuk kam pasur kurrë diçka që mund të më sfidonte në këtë mënyrë dhe as Alejandro. Kur e shihni këtë film, është krejtësisht origjinal” – tha ai.
Traileri e paraqet Cruise me flokë gri, bark dhe një theks të fortë jugor në rolin e një baroni nafte, shoqëria e të cilit mund të ketë shkaktuar një katastrofë ekologjike që mund të çojë në luftë bërthamore. Sipas sloganit të filmit, ai më pas "ndërmerr një mision frenetik për të provuar se është shpëtimtari i njerëzimit përpara se katastrofa që ka shkaktuar të shkatërrojë gjithçka".
Kasta e aktorëve mbështetës janë John Goodman, Riz Ahmed, Michael Stuhlbarg, Jesse Plemons dhe Sophie Wilde.
“Çfarë filmi brilant. Ishte i mrekullueshëm”, - tha aktori me entuziazëm.
Rreth 7 vjet më parë, Iñárritu ia propozoi Cruise rolin e Digger gjatë disa ditëve, ku regjisori ia lexoi aktorit skenarin me zë të lartë.
“Po dëgjoj gjithçka që ka në mendjen e tij, në mënyrë që ta kuptoj këtë, dhe pastaj të di si të kontribuoj në të, dhe ta sjell atë bashkëpunim së bashku. Ishte e mrekullueshme”, - tha Cruise.
“Nuk ka asgjë më të mirë sesa të qëndrosh fizikisht dhe metaforikisht në buzë të një shkëmbi dhe të thuash: “Le ta bëjmë këtë. Dhe unë të besoj ty, dhe çfarëdo që të bëjmë, e di që kjo do të jetë një përvojë e tmerrshme”, shtoi ai.
Iñárritu është shprehur se ideja për Digger i erdhi ndërsa po përfundonte filmin e tij epik të vitit 2015, “The Revenant”, i cili i dha Oscarin për regjisorin më të mirë, si dhe çmimin për aktorin më të mirë për yllin Leonardo DiCaprio.
“Ishte menjëherë pas filmit “The Revenant” kur më lindi një ide”, kujtoi regjisori. Jo një skenar, jo një film, thjesht një obsesion i pamëshirshëm dhe i përsëritur që ka vazhduar gjatë gjithë këtyre viteve të egra. E dija kush ishte ky personazh.
E dija si fliste, si mbijetonte, si e joshte realitetin që të pajtohesha me të. Por më duheshin 10 vjet për ta bërë këtë film, sepse nuk po kërkoja një histori. Po kërkoja mënyrën e duhur për ta thënë. Dhe është absurde, është e rrezikshme, por sigurisht komike, sepse burimi i komedisë së madhe është tragjedia" –tha ai.
Digger u xhirua në VistaVision, një proces analog me definicion të lartë i prezantuar për herë të parë në vitet 1950, i cili është rikthyer në popullaritet kohët e fundit, me filma të tillë si “The Brutalist” dhe “One Battle After Another” të xhiruar me këtë teknikë. ©LAPSI.al
