Mediat rumune kanë publikuar pamjet e arrestimit në këtë vend të Aurel Hoxhallarit, 49-vjeçarit të shpallur në kërkim ndërkombëtar dhe të dënuar me burgim të përjetshëm për vrasjen e Devi Kasmit në vitin 2018.
Siç shihet edhe nga pamjet, Hoxhallari është i prangosur dhe shoqërohet nga forca të shumta policie pas arrestimit. Sipas mediave rumune, arrestimi i tij është kryer më 15 gusht, pranë stacionit të pagesës Calafat-Vidin.
Raportohet se Hoxhallari është ndaluar nga oficerët e Shërbimit Territorial të Policisë Kufitare të Doljit, dhe gjatë kontrollit dyshohet se është paraqitur me një identitet të rremë.
49-vjeçari ishte shpallur në kërkim ndërkombëtar nga autoritetet shqiptare, pasi ndaj tij rëndonte dënimi me burgim të përjetshëm për vrasjen e Devi Kasmit.
Kasmi u ekzekutua me armë zjarri më 29 janar 2018, në rrugën “Kongresi i Manastirit” në Tiranë. Sipas hetimeve, Hoxhallari dyshohet se kishte organizuar vrasjen në bashkëpunim me persona të tjerë, mes tyre edhe një shtetas grek.
Pas arrestimit në Rumani, pritet të vijojnë procedurat ligjore për ekstradimin e Aurel Hoxhallarit drejt Shqipërisë. ©LAPSI.al
