Tre zjarrfikës kanë humbur jetën duke luftuar me zjarret masive që po përfshijnë Greqinë, ndërsa vala e të nxehtit vijon të ushqejë flakët në disa rajone të vendit. Dy prej viktimave mbetën të bllokuar nga zjarri në zonën e Rethymnos, në ishullin e Kretës, ndërsa zjarrfikësi i tretë u gjet pa ndjenja pranë qytetit portual Gytheio, në Peloponez.
Erërat e forta kanë favorizuar përhapjen e flakëve, duke detyruar autoritetet të evakuojnë disa fshatra. Banorët dhe turistët u larguan me nxitim nga fshati malor Krya Vrysi, ndërsa dëshmitarët raportuan një front zjarri që u shtri deri në 15 kilometra. Vatra të tjera aktive janë regjistruar edhe në ishujt Paros dhe Lesbos, si dhe në rajonin e Trifilisë, ku zjarrfikësit vijojnë betejën për të vënë flakët nën kontroll.
