Autoritetet greke kanë identifikuar trupin e pajetë të gjetur brenda një valixheje në një ndërtesë të braktisur në qendër të Athinës. Viktima është një 38-vjeçare me shtetësi britanike, e cila sipas hetimeve paraprake kishte humbur jetën disa javë përpara se trupi të zbulohej.
Trupi u gjet më 18 korrik nga një person i pastrehë në një ndërtesë të braktisur në lagjen Kypseli të Athinës. Viktima ishte mbështjellë me rroba dhe ishte vendosur në një qese mbeturinash brenda valixhes.
Sipas autoriteteve greke, gruaja ishte rreth 1.62 metra e gjatë, me flokë të kuqërremtë të lidhur topuz. Në momentin e gjetjes ajo mbante veshur një bluzë të zezë dhe pantallona të shkurtra. Nuk kishte tatuazhe apo shenja të tjera dalluese.
Hetimet kanë zbuluar se 38-vjeçarja kishte mbërritur në Greqi më 29 qershor nga Qiproja, pasi kishte udhëtuar më parë nga Shtetet e Bashkuara të Amerikës.
Policia greke vijon hetimet për zbardhjen e plotë të ngjarjes, ndërsa po analizohen pamjet e kamerave të sigurisë për të rindërtuar lëvizjet e saj përpara vdekjes.
Për shkak të mënyrës se si u gjet trupi, autoritetet e trajtojnë çështjen si një akt kriminal. Sipas mediave greke, autopsia ka treguar se viktima kishte ndërruar jetë rreth tetë ditë përpara zbulimit të trupit, ndërsa nuk janë konstatuar shenja dhune apo përleshjeje.
Hetuesit nuk përjashtojnë përfshirjen e autoriteteve britanike në procesin hetimor, ndërsa puna për zbardhjen e rrethanave të vdekjes vijon.
