Kryebashkiaku i Tiranës, Erion Veliaj, i është drejtuar Gjykatës së Lartë me kërkesë për ndryshimin e masës së sigurisë "arrest në burg" dhe lirimin e tij të menjëhershëm. Në kërkesë, mbrojtja kërkon që Gjykata e Lartë ta shqyrtojë çështjen në themel, pa e kthyer për rigjykim në gjykatat më të ulëta. Sipas avokatëve, duhet të rivlerësohet nëse arresti vijon të jetë i domosdoshëm dhe nëse janë marrë në konsideratë masa më të lehta të sigurisë.
Një tjetër kundërshtim lidhet me mbajtjen e Veliajt në kafazin e xhamit gjatë seancave gjyqësore. Mbrojtja argumenton se kjo cenon dinjitetin e tij dhe parimin e prezumimit të pafajësisë, duke kërkuar që ai të mos qëndrojë më në këtë ambient gjatë proceseve. Avokatët theksojnë gjithashtu se vijimi i arrestit e pengon Veliajn të ushtrojë mandatin e kryebashkiakut, të fituar deri në vitin 2027. Sipas tyre, zvarritja e procedurave do ta bënte të pamundur rikthimin efektiv në detyrë edhe nëse ai do të fitonte çështjen.
Për këto arsye, mbrojtja i kërkon Gjykatës së Lartë të ndryshojë masën e sigurisë dhe të urdhërojë lirimin e menjëhershëm të Veliajt.
