Numri i viktimave nga tërmeti i fuqishëm me magnitudë 7.8 që goditi Philippines është rritur në të paktën 41 persona, ndërsa mbi 450 të tjerë janë plagosur, sipas burimeve provinciale të cituara nga AFP. Ekipet e shpëtimit po vazhdojnë kërkimet për persona të bllokuar nën rrënojat e një ndërtese të shembur në qytetin General Santos, një nga zonat më të goditura nga lëkundjet e forta.
Sipas autoriteteve lokale, të paktën dy persona janë nxjerrë të gjallë nga rrënojat, ndërsa një tjetër është gjetur i pajetë. Ende raportohet për persona të zhdukur. Tërmeti u ndje fuqishëm në ishullin Mindanao dhe shkaktoi shembje ndërtesash, dëmtime në infrastrukturë dhe ndërprerje të energjisë elektrike në disa zona. Në rrugë janë raportuar mbeturina, linja elektrike të rrëzuara dhe dëme të konsiderueshme materiale.
Dëshmitarët dhe familjarët e të zhdukurve po përjetojnë momente ankthi, ndërsa ekipet e shpëtimit vijojnë punën në kushte të vështira për të arritur te të bllokuarit. Autoritetet filipinase të emergjencave po kontrollojnë ndërtesat e dëmtuara dhe kanë ngritur struktura ndihme për të plagosurit. Shumë pacientë janë transferuar në spitale fushore për shkak të dëmtimeve të infrastrukturës shëndetësore.
Instituti i Vullkanologjisë dhe Sizmologjisë në Filipine ka regjistruar mbi 20 lëkundje pasuese, përfshirë një me magnitudë 6.7, duke shtuar frikën e banorëve dhe duke i detyruar shumë prej tyre të kalojnë natën jashtë shtëpive.
Filipinet ndodhen në të ashtuquajturën “Unaza e Zjarrit” në Paqësor, një nga zonat më aktive sizmike në botë, ku tërmetet janë të shpeshta dhe shpesh shkatërruese. Ky tërmet vjen vetëm pak muaj pas një tjetër ngjarjeje fatale në vend, që kishte shkaktuar dhjetëra viktima, duke rikthyer shqetësimet për gatishmërinë ndaj fatkeqësive natyrore në rajon.
