Një aksion policor është zhvilluar mbrëmjen e kaluar në fshatrat e Lumit të Vlorës. Bëhet me dije se deri më tani janë arrestuar disa persona, mes tyre edhe një person i shpallur në kërkim ndërkombëtar si dhe të tjerë që janë shpallur në kërkim.
Gjatë operacionit janë sekuestruar edhe katër armë të llojit pistoletë dhe një automjet i blinduar. Megjithatë, ende nuk janë bërë publike identitetet e personave të ndaluar dhe as detajet mbi veprat penale për të cilat dyshohen.
Në krye të operacionit ka qenë vetë drejtori i Policisë së Qarkut Vlorë, Edvin Ndreu, ndërsa në aksion kanë marrë pjesë forca të shumta policore. Policia e Shtetit pritet të dalë me një komunikim zyrtar për të dhënë më shumë detaje mbi rezultatet e operacionit, personat e arrestuar dhe materialet e sekuestruara.
