Era e fortë që përfshiu pasditen e së premtes qytetin e Gjirokastrës ka shkaktuar rrëzimin e disa pemëve në lagjen Granicë dhe në zonën e Viroit, duke bllokuar përkohësisht qarkullimin në disa segmente rrugore.
Sipas njoftimit të Drejtorisë së Mbrojtjes nga Zjarri dhe Shpëtimit (MZSH) Gjirokastër, ekipet e ndërhyrjes u angazhuan menjëherë në të dyja zonat për largimin e pemëve të rrëzuara dhe rikthimin e qarkullimit normal.
Autoritetet bëjnë me dije se nga incidentet nuk janë shënuar persona të lënduar apo dëme materiale. Problemi i vetëm i shkaktuar ishte bllokimi i përkohshëm i rrugëve, ndërsa pas ndërhyrjes së shërbimeve situata u normalizua.
Shërbimet u bëjnë thirrje qytetarëve të tregojnë kujdes gjatë lëvizjes në kushte të motit të paqëndrueshëm dhe të shmangin qëndrimin pranë pemëve apo objekteve që mund të rrezikohen nga era e fortë.
