Dëgjesa publike e radhës për Reformën Administrativo-Territoriale në bashkinë Prrenjas është shoqëruar me debate dhe përplasje të forta mes banorëve dhe përfaqësuesve politikë. Debati mori tone të forta mes socialistit Ardit Facja dhe deputetit të Partisë Socialiste, Olsi Komici. Facja shprehu kundërshtimin e tij ndaj bashkimit me Librazhdin, ndërsa qëndrimi i tij u mbështet me brohorima edhe nga të pranishmit në sallë. “Jeni mësuar të bëni ça të doni, por ta harroni”, dëgjohet të ketë thënë Facja ndër të tjera, teksa ka replikuar me Komicin.
Takimi, i zhvilluar në kuadër të konsultimeve për riorganizimin e njësive të qeverisjes vendore, u shndërrua në një ballafaqim të drejtpërdrejtë mes qytetarëve dhe deputetit të Partisë Socialiste, Olsi Komici. Banorët e Prrenjasit shprehën kundërshtimin e tyre ndaj propozimit për bashkimin me bashkinë Librazhd, duke argumentuar se një riorganizim i tillë rrezikon të sjellë largimin e shërbimeve publike nga qytetarët, rritjen e kostove dhe dobësimin e vëmendjes ndaj zonave periferike. Gjatë diskutimeve, qytetarët kërkuan përgjigje dhe llogaridhënie nga deputeti Komici lidhur me qëndrimin e tij ndaj Reformës Territoriale. Disa prej tyre e akuzuan atë se nuk ka përfaqësuar sa duhet interesat e banorëve të zonës në Parlament.
Në debat u ngritën gjithashtu shqetësime për mënyrën se si reforma e vitit 2014 ka ndikuar në decentralizimin dhe ofrimin e shërbimeve publike. Banorët argumentuan se bashkimi i Prrenjasit me Librazhdin mund të krijojë një tjetër përqendrim administrativ, duke e bërë më të vështirë aksesin e qytetarëve në shërbime.
