Pas largimit nga grupi parlamentar i Partisë Socialiste, deputetja Marjana Koçeku iu bashkua protestës së zhvilluar në Tiranë. Prania e saj në tubim vjen pak ditë pasi ajo njoftoi publikisht shkëputjen nga shumica qeverisëse, duke e lënë PS me 82 deputet.
Më 14 qershor, përmes rrjeteve sociale, Koçeku bëri të ditur vendimin për t’u shpallur deputete e pavarur. Një ditë më vonë, ajo publikoi simbolin e flamingos, i cili është përdorur gjerësisht nga protestuesit në tubimet e fundit.
Deputetja ka qenë në qendër të vëmendjes edhe për shkak të kërcënimeve që ka deklaruar se ka marrë së fundmi. Koçeku ka denoncuar publikisht presione dhe kërcënime me jetë, të cilat sipas saj lidhen me anëtarë të fisit Bajri, pas qëndrimeve dhe denoncimeve të saj publike. Pjesëmarrja e saj në protestë shihet si një tjetër sinjal i distancimit nga mazhoranca, në një kohë kur lëvizja qytetare po vijon tubimet e saj në Tiranë dhe në qytete të tjera të vendit.
