Të paktën 7 persona kanë humbur jetën pasi një katamaran pasagjerësh u përmbys pranë brigjeve të Kyrenias në Qipron turke. Anija ishte fundosur sapo ishte nisur drejt portit Tasuczu në Mersin, në Turqinë jugore. 23 persona janë ende në kërkim, sipas autoriteteve vendase ndërsa 237 janë shpëtuar.
Anija u nis pak pas mesditës nga porti turistik i Kyrenias dhe teksa ishte disa kilometra larg bregut, filloi të merrte ujë nga turi. Sipas informacioneve të deritanishme, kapiteni u përpoq të kthehej në port, por nuk mundi ta bënte këtë. Anija u anua shpejt dhe përfundimisht u fundos.
Videot e publikuara në mediat qipriote tregonin pasagjerë në anijen e përmbysur duke pritur ndihmë. Dëshmitarët okularë raportuan gjithashtu se disa pasagjerë u detyruan të hidheshin në det kur uji filloi të hynte në katamaran.
Sipas një deklarate të kryetart të bashkisë së Kyrenias, 159 persona janë shpëtuar pas një mobilizimi të madh të rojes bregdetare turkoqipriote në zonë.
Shkaku i futjes së ujit në anije mbetet i panjohur. Incidenti ndodhi teksa e gjithë Qiproja është prekur nga moti i keq dhe erërat e forta. Megjithatë, ende nuk ka konfirmim zyrtar se përmbysja është shkaktuar nga moti i keq. ©LAPSI.al
