Këshilli Këshillimor për Sigurinë Jashtë Vendit (OSAC), strukturë pranë Departamentit Amerikan të Shtetit, ka publikuar një njoftim sigurie për qytetarët amerikanë që ndodhen në Shqipëri, lidhur me protestën që do të zhvillohet të enjten para Parlamentit.
Sipas njoftimit, protesta është planifikuar të zhvillohet përpara godinës së Parlamentit dhe mund të sjellë bllokime të përkohshme të qarkullimit, devijime të trafikut dhe prani të shtuar të forcave të policisë. Autoritetet amerikane u bëjnë thirrje shtetasve të tyre të shmangin zonën e protestës, të tregojnë kujdes të shtuar dhe të monitorojnë mediat lokale për çdo zhvillim të ri.
OSAC thekson se edhe protestat paqësore mund të përshkallëzohen papritur, ndaj rekomandohet që qytetarët amerikanë të ndjekin udhëzimet e autoriteteve vendase, të planifikojnë lëvizjet me kohë dhe të shmangin grumbullimet e mëdha.
Njoftime të tilla publikohen rregullisht nga ambasadat dhe strukturat amerikane për të informuar shtetasit e SHBA-së mbi situatat që mund të ndikojnë në sigurinë e tyre gjatë qëndrimit jashtë vendit.
