Analizat e kryera në një meteorit të gjetur në vitin 2022 në shkretëtirën e Saharasë në Mali kanë zbuluar se ai u formua të paktën 4.1 miliardë vjet më parë në koren e planetit Mars, duke e bërë atë më të vjetrin nga 435 meteoritët marsianë të gjetur në Tokë deri më sot.
Shkencëtarët thanë se përbërja e meteoritit “Teghaza 001” ofron informacione në lidhje me mjedisin e planetit "të kuq" në fillim të historisë së tij, pasi tregon se ai kishte ujë të lëngshëm në sipërfaqen e tij, gjë që forcon idenë se kushtet në Mars mund të kenë qenë të favorshme për zhvillimin e jetës mikrobike.
Shkencëtari planetar Yang Liu i NASA-s, i menaxhuar nga Universiteti Caltech në Kaliforni, tha se meteori është "dëshmi e një kohe kur Marsi ishte ndoshta më i ngrohtë dhe më i lagësht sesa ka qenë për pjesën më të madhe të historisë së tij".
Kimia e meteoritit, një shkëmb magmatik i quajtur gabro, sugjeron që ai ndërveproi me ujin teksa ftohej dhe kristalizohej ngadalë në nëntokën marsiane. Edhe pse pjesë e kores marsiane, ai u formua nga magma që vinte nga më thellë në mantelin e planetit.
Sot, Marsi është i ftohtë, i thatë dhe shkretëtirë, por ka prova se uji ekzistonte në sipërfaqen e tij, në formën e lumenjve, liqeneve dhe madje edhe të një oqeani në hemisferën e tij veriore miliarda vjet më parë.
“Teghaza 001” u gjet në 8 copa - më e madhja ishte sa një grusht - në shkretëtirë. Mineralet e tij kryesore janë feldspati dhe pirokseni, dhe gjithashtu përmban kristale zirkon që përmbajnë elementin uranium. Studiuesit përcaktuan moshën e tij duke përdorur një teknikë të bazuar në zbërthimin radioaktiv të uraniumit në plumb me kalimin e kohës. ©LAPSI.al
