Zgjedhjet rajonale në Gjermani kanë sjellë një rezultat historikisht të dobët për CDU-në e kancelarit Friedrich Merz. Partia humbi ndjeshëm mbështetje në dy lande, ndërsa AfD fitoi në Mecklenburg-Pomeraninë Perëndimore dhe Die Linke në Berlin. Në Mecklenburg-Pomeraninë Perëndimore, AfD doli forcë e parë me 38.22% të votave, e ndjekur nga SPD me 35.50%. CDU mori vetëm 4.89%, duke mbetur nën pragun prej 5% për hyrjen në parlamentin e landit.
Ky është rezultati më i dobët i CDU-së në zgjedhjet e një landi që prej vitit 1949 dhe hera e parë që partia rrezikon të mbetet jashtë një parlamenti rajonal për shkak të pragut elektoral. Humbje të ndjeshme CDU regjistroi edhe në Berlin. Die Linke fitoi zgjedhjet me 25.65% të votave, ndërsa CDU ra në 18.8%, rreth 9.5 pikë përqindjeje më pak krahasuar me zgjedhjet e mëparshme. AfD mori 16.3%. Rezultatet shtojnë presionin politik ndaj Merz, i cili e cilësoi performancën e partisë së tij si një “katastrofë”, por deklaroi se do të vazhdojë me reformat e qeverisë.
