Një aksident me pasojë vdekjen është regjistruar në orët e para të mëngjesit në qytetin e Lushnjës. Viktimë ka mbetur 43-vjeçari Ernis Xhumari, vëllai i zv.ministres së Mjedisit, banues në Karbunarë të Lushnjës. Sipas burimeve, pak para aksidentit 43-vjeçari ka shkuar para Komisariatit të Lushnjës duke xhiruar gomat dhe duke përdorur fjalor ofendues.
Menjëherë pas këtyre manovrave, patrulla e policisë është nisur drejt vendngjarjes për verifikim. Sapo ka konstatuar policinë, Xhumari është larguar me shpejtësi të madhe. Në tentativë për t'u arratisur 43-vjeçari ka marrë drejtimin drejt Karbunarës me shpejtësi dhe nuk ka mundur të shmangë rrethrrotullimin
Në zonën e rrethrrotullimit të Plastmasit, automjeti ka humbur kontrollin, është përplasur me bordurat anësore dhe është përmbysur. Si pasojë e përplasjes së fortë, 43-vjeçari Ernis Xhumari ka humbur jetën në vendngjarje. Sipas burimeve hetimore, rreth dy muaj më parë Xhumari ishte proceduar dhe i ishte hequr leja e drejtimit për drejtim mjeti në gjendje të dehur.
