Policia ushtroi dhunë në momentin e shoqërimit të protestuesve para parlamentit por nuk ka pasur dhunë gjatë dërgimit në Komisariatin nr. 1.
Kështu u shpreh Dritan Goxhaj pak minuta pas lirimit nga Policia, pas disa orësh shoqërimi dhe procedimi.
Ai tha se nuk ka pasur akuza por vetëm procedim për kundërshtim të punonjësve të policisë. Goxhaj tha se Avokati i Popullit shkoi për t’i takuar, por ata nuk e pranuan sepse ishte i votuar nga Parlamenti i krimit.
“Avokatin e Popullit Endri Shabani nuk e pranuam ta takonim dhe kërkuam largimin e tij nga qelia jonë menjëherë Të shoqëruarit e tjerë janë në procedurat e fundit. Nuk ka procedim ka vetëm një dyshim hetim për kundërshtim të punonjësit të policisë, nuk ka akuzë. Nuk ka të ndaluar por ka të shoqëruar”, tha ai mes të tjerash.
Më tej Goxhaj shpjegoi dinamikën e dëmtimit të një prej protestuesve.
“Një nga djemtë që ka qenë kur ka përdorur policia sprajt i ka rënë pak spraj në sy i kanë rënë dhe syzet dhe ka pësuar dëmtim të vogël. Nuk është shoqëruar dhunë gjatë shoqërimit në polici por vetëm atje para parlamentit ka pasur dhunë, në momentin që janë shoqëruar, për të thënë të vërtetën dhe të jemi të ndershëm. Dëmtim tjetër këtu nga të shoqëruarit nuk ka. Ne protestojmë për të thënë të vërtetën, por nuk ka pasur dhunë tjetër”, tha Goxhaj.
