Një person ka humbur jetën dhe dy të tjerë kanë mbetur të plagosur si pasojë e një aksidenti të rëndë rrugor në orët e para të mëngjesit në aksin Lezhë–Milot, në afërsi të fshatit Gocaj. Sipas policisë, rreth orës 04:30 një automjet tip kamion, i drejtuar nga shtetasi A. M., është përplasur me një automjet tjetër që drejtohej nga shtetasi kosovar K. B.
Për pasojë, drejtuesi i automjetit, K. B., humbi jetën në vendngjarje. Ndërkohë, motra e tij, F. B., dhe djali i tij, po ashtu me inicialet F. B., mbetën të plagosur dhe u transportuan në Spitalin e Traumës për ndihmë mjekësore. Sipas mjekëve, ata ndodhen jashtë rrezikut për jetën. Grupi hetimor ka nisur punën për zbardhjen e shkaqeve dhe rrethanave të aksidentit.
