“Ka nga ata që fshihen”, Bremer përplaset me teknikun Spalletti: “Edhe ai është i përfshirë deri në fyt”

Humbja kundër Lazios në JStadium ka lënë pasoja të rënda në kampin e Juventus. Një disfatë 3-0, që nuk lë vend për justifikime dhe pas së cilës lojtarët u larguan nga fusha mes vërshëllimave të fuqishme të tifozëve të tyre. Një humbje që i vë të gjithë nën akuzë, pa përjashtuar askënd. Ky është mendimi që Luciano Spalletti shprehu në konferencën për shtyp, por që bie ndesh me analizën e kapitenit të skuadrës, Bremer, i cili e sheh krizën nga një këndvështrim krejtësisht tjetër.

“Nuk po drejtoj gishtin nga askush”, deklaroi mbrojtësi, “por ka nga ata që kanë frikë përballë vërshëllimave të tifozëve”. Përgjigjja e teknikut Spalletti ishte e menjëhershme: “Humbjet nuk e përjashtojnë askënd nga përgjegjësia. Edhe ai është i përfshirë deri në fyt”.

Ajo që u pa pas ndeshjes ishte vazhdimi i një mbrëmjeje të vështirë për Juventusin, që kërkonte të reagonte pas një serie prej vetëm katër pikësh në pesë ndeshjet e fundit të kampionatit. Në vend të kësaj, bardhezinjtë dolën edhe më të dobësuar, si për nga loja, ashtu edhe për nga pritshmëritë, përballë një Lazioje të shkëlqyer, të drejtuar mjeshtërisht nga Gattuso, i cili konfirmoi edhe një herë cilësinë e punës së tij.

Fjalët e Bremerit: “Ka nga ata që kanë frikë dhe fshihen”

“Bomba” u hodh nga qendërmbrojtësi dhe kapiteni i Juventusit në studiot e Sky, pas një pyetjeje të Giancarlo Marocchit, i cili po përpiqej të kuptonte se si ishte e mundur që bardhezinjtë të dështonin kaq rëndë në ndeshjen kryesore të javës. Sfida përfundoi me triumfin e Lazios, e cila u rikthye në krye të renditjes së bashku me Interin, ndërsa Juventusi mbeti i mbërthyer në 11 pikë pas shtatë javësh. 

“Trajneri na jep udhëzime, por në fund jemi ne ata që zbresim në fushë”, e nisi Bremer, përpara se të shprehej drejtpërdrejt për një çështje që do të trajtohej më pas edhe në konferencën për shtyp nga trajneri bardhezi. “Jemi njëmbëdhjetë lojtarë plus pesë të tjerë dhe nuk mund t’i marr të gjithë në krahë… Unë flas dhe ndihmoj, por secili ka karakterin e vet. Unë mund të shkoj deri në një pikë, pastaj gjithçka varet nga secili. Ka nga ata që kanë më shumë karakter dhe nga ata që kanë më pak. Ka edhe nga ata që, kur dëgjojnë vërshëllimat, fshihen nga frika”.

Analiza u zhvendos edhe te përbërja e Juventusit të ri, me një skuadër që ka shumë futbollistë të rinj në krahasim me sezonet e kaluara. Por qëndrimi i kapitenit nuk ndryshoi. “Nuk po drejtoj gishtin nga ndonjë person në veçanti. Secili ka karakterin e vet: ka nga ata që dalin përpara kur gjërat shkojnë keq dhe nga ata që fshihen. Është normale. Secili është ndryshe”.

Përgjigjja e teknikut Spalletti: “Edhe ai është i përfshirë deri në fyt”

Fjalët e Bremerit i habitën aq shumë të pranishmit në studio, saqë ata kërkuan konfirmim të drejtpërdrejtë nëse kapiteni po thoshte se brenda skuadrës kishte lojtarë që nuk ishin në lartësinë e duhur, që u mungonte karakteri dhe që nuk dinin të përballeshin me momentet e vështira. “Po, po, këtë thashë, por nuk po drejtoj gishtin nga djemtë… Ka nga ata që fshihen”, u përgjigj mbrojtësi.

Në konferencën për shtyp që pasoi menjëherë, deklaratat e forta të kapitenit iu përcollën Luciano Spallettit. Trajneri tha se Bremer kishte të drejtë të analizonte situatën dhe të shprehte mendimin e tij si kapiten, por njëkohësisht u distancua qartësisht nga përmbajtja e atyre fjalëve.

“Megjithatë, edhe ai është pjesë e ndeshjes së sotme, ashtu siç jam unë”, deklaroi Spalletti, i cili për shkak të pezullimit nuk kishte qëndruar në pankinë, por në tribunë. “Edhe ai është i përfshirë. Përpara se të flasim për veten, duhet të flasim për skuadrën. Do të ishte shumë e lehtë të kërkonim fajtorë diku tjetër. Bremer nuk përjashtohet nga paraqitja e skuadrës. Edhe ai është i përfshirë deri në fyt”.