Më shumë se dy dekada pas divorcit të tyre, Jennifer Aniston ka bërë një koment të rrallë për ish-bashkëshortin e saj, Brad Pitt, duke kujtuar me humor paraqitjen e tij në serialin ikonik Friends.
Gjatë bisedës së saj me Lisa Kudrow për rubrikën “Actors on Actors” të Variety, Kudrow rikujtoi episodin e famshëm ku Pitt ishte i ftuar special.
“Kur Brad ishte në serial, ishte shumë qesharake,” tha Kudrow.
Aniston u pajtua menjëherë duke shtuar: “E di. Sa qesharake ishte.”
Më pas, aktorja e zhvendosi bisedën te emrat e mëdhenj të Hollivudit që kanë bërë paraqitje speciale në serial ndër vite, duke përmendur Bruce Willis, Julia Roberts, Isabella Rossellini dhe Sean Penn.
“Gjithmonë ishin nervozë. E mbani mend? Mua më dukej gjithmonë interesante sa nervozë ishin,” tha Aniston.
Pitt u shfaq në episodin e Falënderimeve të sezonit të tetë të “Friends”, të titulluar “The One with the Rumor”, në vitin 2001. Ai interpretoi personazhin Will Colbert, një ish-shok shkolle i Ross Geller, i cili ishte pjesë e një klubi të quajtur “I Hate Rachel”.
Në kohën kur u xhirua episodi, Pitt dhe Aniston ishin ende të martuar. Çifti qëndroi së bashku për pesë vite përpara se t’i jepte fund martesës në vitin 2005.
Së fundmi, Aniston ka reflektuar edhe mbi ndarjen e tyre, duke e përshkruar atë si një periudhë të vështirë për shkak të vëmendjes së madhe mediatike.
Në një intervistë për Vanity Fair në gusht 2025, aktorja tha se përvoja ishte “tronditëse” dhe shumë e ndjeshme për të.
“Gazetaria në atë kohë dukej më shumë si një sport. Mendoj se të gjithë kemi mbetur me një lloj PTSD-je nga ajo periudhë, prandaj intervistat ende më frikësojnë,” u shpreh Aniston.
