I dërguari i presidentit Donald Trump për misione të posaçme, Richard Grenell, reagoi ashpër pas vendimit të Dhomave të Specializuara për Hashim Thaçin, duke e cilësuar dënimin "skandaloz" dhe duke kërkuar mbylljen e Gjykatës Speciale.
"Dënimi i shpallur nga Gjykata e Hagës ndaj Hashim Thaçit për një luftë të zhvilluar 25 vjet më parë është skandaloz. Askush nuk është i sigurt nga këto gjykata ndërkombëtare, ku elitat akademike marrin vendime politike. Këta tre gjyqtarë dhe prokurori amerikan janë të çmendur të së majtës. Ata qartazi nuk i dëgjuan këshilltarët e Bill Clintonit, të cilët e bënë të qartë se Thaçi nuk e drejtonte luftën.
Të gjitha këto gjykata duhet t'u ndërpritet menjëherë financimi. Departamenti i Drejtësisë dhe Prokurori i Përgjithshëm Todd Blanche duhet të veprojnë shpejt. Amerikanët po paguajnë për këto ndjekje penale politike dhe kjo duhet të marrë fund. Albin Kurti duhet gjithashtu të veprojë shpejt për ta shpërbërë këtë gjykatë të huaj. Deputetët duhet të punojnë me Kurtin që kjo të ndodhë. Kosovës nuk i duhet një gjykatë në Holandë" - shkroi Grenell.
Më pas ai ka reaguar pas deklaratës së komisioneres së Zgjerimit Marta Kos, e cila kërkonte respektimin e vendimit të Hagës për liderët e UÇK-së.
Grenell u shpreh se Evropa duhet të reformojë institucionet dhe politikat e saj, duke shtuar se këto gjykata radikale duhet të financohen menjëherë.
“Jo. Gjashtë vjet mbajtje në burg të dikujt për diçka që, sipas jush, ka ndodhur 25 vjet më parë është e turpshme. Evropa duhet të reformojë institucionet e saj dhe politikat e saj. Kjo nuk është drejtësi; është aktivizëm i elitave. Është edhe një njollë tjetër për Evropën. Financimi për këto gjykata radikale duhet të ndërpritet menjëherë”, - shkroi Grenell në X. /LAPSI.al
