Kreu i Grupit Parlamentar të Partisë Demokratike, Gazment Bardhi, ka reaguar pas bllokimit në Instagram të disa llogarive të qytetarëve dhe aktivistëve që kanë mbështetur protestën e flamingove, duke e cilësuar atë që po ndodh si një përpjekje për censurimin e zërave kritikë ndaj qeverisë.
Bardhi e krahason situatën me atë që, sipas tij, ka ndodhur në Serbinë e Aleksandar Vuçiçit gjatë protestave studentore. “Ajo që ndodhi në Serbinë e Vuçiçit gjatë protestave masive të studentëve kundër qeverisë, po shfaqet sot edhe në Shqipërinë e Edi Ramës”, shkruan ai.
Sipas Bardhit, bllokimi i disa llogarive që kanë qenë aktive në pasqyrimin dhe mbështetjen e protestës nuk është rastësi, por pjesë e asaj që ai e quan “algoritmi i censurës”.
“Ky është algoritmi i censurës së një Kryeministri që kërkon ta mbulojë dështimin e vet me heshtjen e shoqërisë. T’u mbyllë gojën kundërshtarëve dhe të zhdukë çdo zë kritik nga hapësira publike”, deklaron Bardhi.
Ai e mbyll reagimin duke shprehur solidaritet me personat të cilëve u janë bllokuar llogaritë: “Nuk ka algoritëm censure që shpëton një qeveri nga e vërteta”.
REAGIMI I PLOTE I KRYETARIT TË GRUPIT PARLAMEMTAR TË PD, GAZMENT BARDHI
Edi Rama si Vuçiçi, algoritmi i censurës kundër opozitës!
Ajo që ndodhi në Serbinë e Vuçiçit gjatë protestave masive të studentëve kundër qeverisë, po shfaqet sot edhe në Shqipërinë e Edi Ramës.
Sot në Shqipëri janë nën sulm dhe janë bllokuar shumë llogari në Instagram të qytetarëve që po mbështesin aktivisht protestën mbi 3 mujore kundër qeverisë.
Ky është algoritmi i censurës së një Kryeministri që kërkon ta mbulojë dështimin e vet me heshtjen e shoqërisë. T’u mbyllë gojën kundërshtarëve dhe të zhdukë çdo zë kritik nga hapësira publike.
Me metodat e Vuçiçit, Edi Rama nuk e ndryshon dot bindjen e shqiptarëve se ai është Kryeministri që i ka bërë më shumë keq vendit në gati katër dekada dhe se duhet të largohet.
Solidaritet me çdo qytetar që është goditur për shkak të zërit të tij kritik. Nuk ka algoritëm censure që shpëton një qeveri nga e vërteta.
