Revista amerikane Forbes vlerëson se presidenti rus Vladimir Putin po përballet me një situatë gjithnjë e më të vështirë, mes luftës në Ukrainë, presioneve të brendshme dhe dobësimit të perceptuar të pozicionit të Kremlinit.
Sipas analizës së publikuar, kolumnistët e revistës lënë të hapur mundësinë që qëndrimi i Putinit në pushtet të mos ketë një afat të qartë, nëse trendet aktuale politike dhe ushtarake vazhdojnë.
Në artikull përmenden sulmet e vazhdueshme me dronë nga Ukraina, të cilat sipas Forbes kanë ndikuar në furnizimin me karburant në Krime, duke krijuar radhë të gjata automjetesh dhe probleme logjistike gjatë sezonit turistik. Ura e Kerçit cilësohet si një nga korridoret kyçe të furnizimit dhe një pikë strategjike me rëndësi simbolike dhe operacionale për Rusinë.
Në analizë theksohet se imazhi i luftës ka ndikim të drejtpërdrejtë në stabilitetin politik, pasi kur pasojat bëhen të dukshme për opinionin publik, ato mund të prekin edhe legjitimitetin e pushtetit. Sipas Forbes, kjo mund të sinjalizojë një erozion gradual të besueshmërisë së Putinit.
Artikulli ndalet edhe te tensionet e brendshme brenda elitave ruse, duke cituar deklarata të blogerëve ushtarakë që paralajmërojnë për pakënaqësi dhe rritje të frikës politike në nivelet e larta të shtetit.
Sipas analizës, këto zhvillime mund të krijojnë një klimë pasigurie në kampin politik rus, ku zyrtarë dhe figura të afërta me pushtetin shqetësohen për të ardhmen e tyre në rast destabilizimi.
Forbes përmend disa skenarë të mundshëm për të ardhmen politike të Putinit, duke nisur nga një largim i detyruar nga pushteti, deri te një përmbysje e dhunshme ose një proces gjyqësor simbolik që do ta kthente atë në “kokë turku” për politikat e Kremlinit.
Në përfundim, revista vlerëson se nëse situata aktuale vazhdon të përkeqësohet, ekziston mundësia që Putin të humbasë pushtetin brenda tre viteve të ardhshme, sipas kësaj analize.
