Shtëpia e ankandeve Sotheby's në New York njoftoi sot se "fustani i famshëm i hakmarrjes" i veshur nga Princesha Diana pas rrëfimit publik të pabesisë nga Princi Charles do të dalë në ankand më 9 dhjetor.
Çmimi i këtij fustani të zi me një dekolte të gjerë, të firmosur nga Christina Stambolian, vlerësohet të jetë midis 150,000 dhe 300,000 dollarëve (129 000 – 259 000 euro), tha Sotheby's në një njoftim për shtyp.
Një pjesë e të ardhurave do të shkojë për Spitalin Mbretëror të Edinburgut në Skoci, i cili është i specializuar në problemet e shëndetit mendor.
Përpara këtij ankandi, fustani do të prezantohet në Londër midis 18 dhe 24 shtatorit, në Hong Kong (1-15 tetor), në Gjenevë (6-11 nëntor) dhe në Nju Jork (nga 2 dhjetori).
"Princesha e Popullit" e veshi këtë fustan, duke thyer kodet e familjes mbretërore britanike gjatë një galaje bamirësie në qershor të vitit 1994, pasi burri i saj Charles pranoi tradhtinë e tij në televizion.
"Princesha Diana e shndërroi këtë fustan në një nga mesazhet më të fuqishme që ka dërguar ndonjëherë", - tha Morgan Halimi, drejtuese e modës në Sotheby's.
“Ajo që u shfaq si një moment viral në shkallë ndërkombëtare u dha gjithashtu të gjithëve, por veçanërisht grave, lejen për të përdorur modën përtej dekorimit të thjeshtë, në një mënyrë shumë më të qëllimshme dhe kuptimplote: si mburojë, si armë, ose si të dyja në të njëjtën kohë.”
Fustani ishte shitur tashmë në ankand për të ndihmuar bamirësitë kundër kancerit dhe AIDS-it në qershor të vitit 1997, pak para vdekjes së Dianës në një aksident me makinë në Paris më 31 gusht, në moshën 36-vjeçare. ©LAPSI.al
