Holanda është alarmuar për shpërndarjen e paligjshme të pilulave të rrezikshme të ekstazisë në formën e kokës së Donald Trump dhe që përmbajnë një përqendrim shumë të lartë të substancës PMMA. Instituti Trimbos ka lëshuar një "paralajmërim të kuq", duke u bërë thirrje qytetarëve të mos i konsumojnë tabletat në asnjë rrethanë.
Pilulat u gjetën me ngjyra të ndryshme dhe u dorëzuan në qendrat e kontrollit të drogës në Holandë. Në njërën anë ato mbajnë imazhin e presidentit amerikan, ndërsa në anën tjetër janë shkruar fjalët "Trump" dhe "NL".
Siç treguan analizat laboratorike, ato përmbajnë një sasi shumë të lartë të para-metoksimetamfetaminës (PMMA), një substancë që tregon ngjashmëri me MDMA-n, përbërësin aktiv në ekstazi, por që konsiderohet veçanërisht e rrezikshme.
Problemi është se PMMA-së i duhet më shumë kohë për të vepruar sesa MDMA-së. Kjo mund ta bëjë përdoruesin të besojë se pilula nuk ka funksionuar dhe të marrë më shumë, duke rritur rrezikun e mbidozës.
Sipas Institutit Trimbos, marrja e pilulave mund të shkaktojë të përziera, rritje të rrahje të zemrës, konvulsione dhe një rritje të rrezikshme të temperaturës së trupit, e cila në disa raste mund të jetë fatale.
Megjithatë, deri më tani nuk janë raportuar vdekje ose sëmundje serioze që lidhen me pilulat. Zëdhënësja e Institutit Trimbos, Aniek Grothaus, tha se nuk ka pasur raste të konfirmuara të PMMA-së në gjak.
Kjo nuk është hera e parë që pilulat e ekstazisë kanë përdorur imazhin e Donald Trump, pasi në vitin 2017, policia gjermane sekuestroi rreth 5,000 tableta në formën e kokës së tij, të cilat kishin qarkulluar në tregun ilegal. ©LAPSI.al
