Kryeministri Edi Rama ka zhvilluar një takim me komunitetin shqiptar në Staten Island, gjatë vizitës së tij në Shtetet e Bashkuara për punimet e Asamblesë së Përgjithshme të OKB-së.
Në fjalën e tij, Rama u ndal te marrëdhënia me diasporën, duke thënë se ajo ka ndryshuar ndjeshëm gjatë viteve të fundit. Sipas tij, lidhja me shqiptarët jashtë vendit nuk mbështetet më vetëm te remitancat, por gjithnjë e më shumë te investimet, interesat ekonomike dhe rikthimi i tyre në Shqipëri.
Një pjesë të rëndësishme të fjalës, kryeministri ia kushtoi projektit turistik të Zvërnecit. Kryeqeveritari sërish e mbrojti projektin turistik duke thënë se ai ka potencial të kalojë vlerën e 4 miliardë eurove. Sipas tij, vendi duhet të kalojë nga turizmi masiv drejt atij me vlerë më të lartë ekonomike. Por ndërsa foli për përfitimet financiare, Rama pranoi se përmasat e projektit e bëjnë atë veçanërisht delikat për mjedisin. Kryeqeveritari gjithashtu zgjodhi t’i përgjigjet ashpër një pjese të kritikëve të projektit, duke i cilësuar pretendimet që qarkullojnë në rrjetet sociale si produkte të “sharlatanëve dhe manipulatorëve”. Edhe më herët ai i ka kundërshtuar protestat dhe akuzat ndaj projektit, ndërsa ka pretenduar se një pjesë e debatit është ushqyer nga dezinformimi.
