Një ngjarje e rëndë u regjistrua mëngjesin e kësaj të dielë në zonën e Fllakës, në Sektor Rinia të Durrësit, ku një zjarr përfshiu ambientet e një magazine ku gatuhej ushqim për punonjësit.
Si pasojë e asfiksimit nga tymi, 25-vjeçari nga Bangladeshi Omar Faruk humbi jetën, pavarësisht tentativës së shokëve të tij për ta nxjerrë jashtë. Ndërkohë si pasojë e zjarrit, një 30-vjeçar nga Kenia po merr ndihmë mjekësore në spital.
Sipas informacionve, dyshohet se flakët janë shkaktuar nga një bombul gazi në ambientin e kuzhinës, në një kohë kur punonjësit e fabrikës së prodhimit të skafeve në Durrës ishin në gjumë. Siç shihet nga pamjet, gjithçka është shkrumbuar në vendin që u përfshi nga zjarri, një ambjent që përdorej edhe nga punëtorët e huaj për të qëndruar dhe fjetur.
Policia dhe forcat zjarrfikëse shkuan në vendngjarje, ndërkohë që falë ndërhyjes së këtyre të fundit, u bë e mundur kufizimi i flakëve të cilat rrezikonin përfshirjen e ambjenteve të tjera të kompanisë. Mësohet se një grup ekspertësh po hetojnë detaje rreth kësaj ngjarje që i kushtoi jetën një punonjësi të huaj dhe shkaktoi dëmtimin e një tjetri. Pas ngjarjes në mjediset e kompanisë mbërriten dhe përfaqësues të Inspektoriatit Shtetëror Teknik dhe Industrial.
