Të paktën nëntë persona kanë humbur jetën dhe dhjetëra të tjerë janë plagosur pas një vale sulmesh ruse gjatë natës në disa qytete të Ukrainës, përfshirë Kievin dhe Dnipron. Sipas autoriteteve ukrainase, katër persona u vranë në Kiev dhe 51 të tjerë u plagosën, ndërsa në Dnipro humbën jetën pesë persona dhe 25 të tjerë mbetën të lënduar. Kryebashkiaku i Kievit, Vitali Klitschko, tha se dy pallate banimi janë goditur dhe disa banorë mund të jenë ende të bllokuar nën rrënoja.
Alarmet ajrore u aktivizuan në pjesën më të madhe të vendit, ndërsa në kryeqytet u panë re të mëdha tymi. Sulmet shkaktuan gjithashtu zjarre dhe ndërprerje të energjisë elektrike në disa zona. Sulmet vijnë pak ditë pasi Moska paralajmëroi se do të intensifikonte goditjet ndaj Ukrainës, si kundërpërgjigje për një sulm ukrainas në rajonin e pushtuar të Luhanskut.
