Një 33-vjeçar është arrestuar nga Policia e Tiranës pasi dyshohet se, pas një konflikti verbal me drejtuesin e një autobusi, ka dëmtuar automjetin duke i thyer xhamat me grushte.
Ngjarja ka ndodhur gjatë pasdites së djeshme në rrugën “Muhamet Gjollesha”. Sipas Policisë, 33-vjeçari me inicialet Ç. K. është konfliktuar verbalisht me drejtuesin e autobusit për motive të dobëta.
Pas debatit, ai dyshohet se e ka fyer dhe ka bërtitur ndaj shoferit, përpara se të godiste me grushte autobusin.
33-vjeçari dyshohet se ka thyer xhamin e përparmë të autobusit dhe xhamin e derës.
Menjëherë pas marrjes së njoftimit, specialistët për Hetimin e Krimeve të Komisariatit të Policisë Nr. 2 kryen veprimet hetimore dhe procedurale, duke bërë të mundur arrestimin e tij në flagrancë.
