Turqia ka kërkuar lëshimin e një "njoftimi të kuq" të Interpolit për arrestimin e kryeministrit izraelit Benjamin Netanyahu. Shkak u bë sulmi ndaj aktivistëve në bordin e “Global Sumud Flotilla”, e cila po transportonte ndihma humanitare për në Gaza. Të premten ministri turk i Drejtësisë Akin Gurlek deklaroi se procedurat janë duke vazhduar para Gjykatës Penale të Stambollit dhe përfshijnë gjithsej 35 të pandehur, përfshirë Netanyahun. Ata akuzohen për gjenocid.
Pas lëshimit të urdhër-arresteve, Ministria Turke e Drejtësisë i kërkoi Ministrisë së Brendshme të fillonte procedurat e nevojshme për lëshimin e njoftimeve të kuqe të Interpolit kundër të pandehurve. Dokumentet përkatëse i janë dërguar edhe Ministrisë së Punëve të Jashtme Turke.
Netanyahu do të përballet me një sërë akuzash të rënda. Këto përfshijnë “krime kundër njerëzimit”, “gjenocid”, “privim të rëndë të lirisë”, “dëmtim të qëllimshëm trupor”, “torturë”, “dëmtim të pronës”, “grabitje të rëndë” dhe “rrëmbim ose sekuestrim të mjeteve të transportit”.
Në një deklaratë, zyra e Netanyahut akuzoi presidentin turk për përpjekje për të zgjeruar konfrontimin me Izraelin në Siri.
"Erdogan tani po kërkon të zgjerojë agresionin e tij kundër Izraelit në Siri. Izraeli nuk do ta tolerojë këtë", tha ajo.
Zyra e kryeministrit izraelit përsëriti akuzat e mëparshme kundër Erdoganit, duke e përshkruar atë si një "diktator antisemit" dhe duke e akuzuar atë për sulm ndaj kurdëve, strehimin e terroristëve të Hamasit, pushtimin e pjesës veriore të Qipros dhe burgosjen e një numri të madh gazetarësh dhe politikanësh që nuk pajtohen me të. ©LAPSI.al
